Kashkol-e-Majzob - Ghazal - Na Samjha Umar Bhar Koi K Main B Tera Bismil Tha

 

نہ سمجھا عمر بھر کوئی کہ میں بھی تیرا بسمل تھا
لبوں پر تھی ہنسی زخموں سے چھلنی گو مرا دل تھا
 
ازل میں کیا نہ تھا ساماں مگر جو میرے قابل تھا
یہی سودا زدہ سر تھا یہی حسرت بھرا دل تھا
 
جُھکا سر غیر کے آگے نہ دل دنیا پہ مائل تھا
سروں میں سر مرا سر تھا دلوں میں دل مرا دل تھا
 
نہ میں دنیا کے لائق تھا نہ میں عقبیٰ کے قابل تھا
مجھے جینا بھی تھا دشوار اور مرنا بھی مشکل تھا
 
یہ سب مانا کہ وہ سفاک تھا ظالم تھا قاتل تھا
دیا جس کو دیا ہاں پھر کسی کو کیا مرا دل تھا
 
ترا فانی تو میں پہلے ہی سے اے میرے قاتل تھا
مرے کو مارنا اے بے خبر! تحصیلِ حاصل تھا
 
پڑا ہے دم بخود مجذوب کیا عجلت سے حاصل تھا
اسے چلنا طریق عشق میں منزل بمنزل تھا
 

خواجہ عزیز الحسن مجذوب

Read Khwaja Aziz Ul Hassan's Most Famous Jaga Jee Lagany Ki Duniya Nahi Hai