Kashkol-e-Majzob - Ghazal - Kisi Sy Seekh Ly Bulbul Sarapa Dastan Rehna

 
کسی سے سیکھ لے بُلبل سراپا داستاں رہنا
ہے ننگ عشق حال دل کا محتاجِ بیاں رہنا
 
کوئی رہنے میں رہنا ہے یہ زیرِ آسماں رہنا
بہ فکر دشمناں رہنا بہ یاد دوستاں رہنا
 
جہاں رہنا ہمیں دنیا میں واقف امتحاں رہنا
کہیں جانا ہمیں ہر پھر کے زیر آسماں رہنا
 
کھٹکتا ہے یہ تنکوں کا گُلوں کے درمیاں رہنا
بہت مشکل ہے اے بُلبل چمن میں آشیاں رہنا
 
ہمیں دونوں برابر ہیں گلستاں ہو کہ صحرا ہو
وہیں کے ہو گئے ہم ہو گیا اپنا جہاں رہنا
 
یہ کیا طرفہ ادا، طرفہ تماشا، طرفہ پردہ ہے
میری آنکھوں میں پھرنا پھر بھی آنکھوں سے نہاں رہنا
 
خدایا رحم کر اے چارہ گر اُف کیسے گزرے گی
پڑا ہم کو جو دُنیا میں نصیبِ دشمناں رہنا
 
خلاصہ ہم سے سن لے کوئی آدابِ محبت کا
دعائیں دل میں دینا، ظلم سہنا، بے زباں رہنا
 
پڑی ہے کشمکش میں جاں پڑا ہے گومگو میں دل
یہ آخر آپ نے سیکھا ہے کس سے چیستاں رہنا
 
بھلا یہ بھی کوئی انداز ہے اے بُلبلِ نالاں
گُلوں کے درمیاں رہ کر بھی مشغولِ فغاں رہنا
 
یہی آتا ہے بس یا اور بھی کچھ تم کو آتا ہے
اُمیدیں توڑنا دل خون کرنا بد گماں رہنا
 
سبق آموز اہلِ جاہ ہے درسِ تواضع ہے
بایں رفعت قدم بوسِ زمیں اے آسماں رہنا
 
بھروسہ کچھ نہیں اس نفسِ امّارہ کا اے زاہد
فرشتہ بھی جہ ہو جائے تو اس سے بد گماں رہنا
 
نہ رہ ناشاد سالک مسلکِ مجذوب پر آجا
اگر ہر حال میں تُو چاہتا ہے شاد ماں رہنا
 
خواجہ عزیز الحسن مجذوب

Read more of Khwaja Aziz Ul Hassan Majzob's Poetry by clicking here